غزل 23
اخترؔ آصفی پشاوری
یہ کیسا دور ہے ساقی یہ کیا دستور ہے ساقی
کسی کے پاس ہے تو اور کسی سے دُور ہے ساقی
ترستا ہے کوئی میخانے میں اک بوند پانی کو
کسی کے جام میں افشردہ انگور ہے ساقی
بھٹکتا ہے کوئی تاریکیوں میں تیرہ بختی سے
کسی کی راہ میں روشن چراغِ نور ہے ساقی
تیری بےاختیاری کا گماں بھی ہو نہیں سکتا
یقیں ہم کس طرح کر لیں کہ تو مجبور ہے ساقی
منور کر فروغِ مئے سے دل کی باطنی آنکھیں
اندھیری رات ہے اور میری منزل دور ہے ساقی
یہاں ہر وقت رہتا ہے مباحِ عیش کا عالم
فضائے میکدہ میں درد و غم کافور ہے ساقی
اسے دنیا و مافیہا سے کیا مطلب جہاں تو ہے
تیرا میخانہ ہے فردوس اور تو حور ہے ساقی
شراب التفاتِ ناز کا ایک جرعہ دیتا جا
که دل تیری محبت کے نشے میں چُور ہے ساقی
بجائے خوں رسا کرتی ہے بے کیفی سی اس میں سے
جدائی کا تری دل میں مرے ناسور ہے ساقی
تو ہوتا ہے تو روشن ہوتی ہیں شمعیں اُمیدوں کی
نہیں ہے تو تو مری شب شبِ دیجور ہے ساقی
تری چشم کرم کا فیض اسے سرشار رکھتا ہے
دل اخترؔ شرابِ عشق سے معمور ہے ساقی