تضمين
علامه اقبال و اخترؔ
اخترؔ آصفی پشاوری
آنسو کا ہر اک قطرہ بنتا ہے شراب آخر
اور دور میں آتا ہے جامِ مئے ناب آخر
کھل جاتی ہے محفل میں الفت کی کتاب آخر
افلاک سے آتا ہے نالوں کا جواب آخر
کرتے ہیں خطاب آخر اٹھتے ہیں حجاب آخر
معلوم تو ہو زاہد آخر تجھے غم کیا ہے
جز جذبہ محکومی تخیل صنم کیا ہے
میدانِ عمل میں آپابند حرم کیا ہے
میں تجھ کو بتاتا ہوں تقدیر امم کیا ہے
شمشیر و سناں اول طاؤس و رباب آخر
میگوں ہے اگر مینا گلرنگ پیالے ہیں
بدمست ہیں مطرب پر اپنے کو سنبھالے ہیں
جذبات ہر اک دل کے ساقی کے حوالے ہیں
میخانہ یورپ کے دستور نرالے ہیں
لاتے ہیں سرور اول دیتے ہیں شراب آخر
ساقی نے جہاں بخشا جام مئے انگوری
ہوتا ہے وہیں ٹھنڈا جوش یم مغروری
کیا طنطنۂ کسریٰ کیا سطوت فغفوری
کیا دبدبہ نادر کیا شوکت تیموری
ہو جاتے ہیں سب دفتر غرق مئے ناب آخر
رکتا ہے کہیں دھارا بہتے ہوئے پانی کا
پلٹا ہے کسی نے رخ دریا کی روانی کا
طوفان تھا اک برپا اسرار نہانی کا
تھا ضبط بہت مشکل اس سیل معانی کا
کہہ ڈالے قلندر نے اسرار کتاب آخر