غزل 62
اخترؔ آصفی پشاوری
نشانِ مرقد عاشق کی جستجو کرتے
وہ خاک چھانتے فریاد کو بکو کرتے
کہیں نشان نہ پایا وہ بے نشان ہو تم
کٹی ہے عمر ہماری تو جستجو کرتے
نصیب غیر ہوا آه بوسہ جاناں
میں وقفِ غم ہی رہا صرفِ آرزو کرتے
نہ بزم غیر میں جاتے نہ تم سبک ہوتے
مرا نہ پاس سہی اپنی آبرو کرتے
بہارِ باغ کو سچ مچ وہ داغ ہو جاتا
اگر گلاب کو اس گل کے روبرو کرتے
جنابِ شیخ ہیں دلداده دخترِ رز کے مگر
کمر ہے خم سہی پر اسی کی ہیں گفتگو کرتے
تری بہشت حقیقت جو شیخ کچھ رکھتا
مسیح و خضر بھی مرنے کی آرزو کرتے
زخود رمیده الفت اگر نہ ہو جاتے
تو ہم کیوں آ کے سربزم ہاؤ ہو کرتے
وہ کیا جنوں کہ رہیں برقرار ہوش و ہواس
ہم آپ گم تھے تو کیا تری جستجو کرتے