غزل 57
اخترؔ آصفی پشاوری
نازنینوں کی اگر دِل میں نہ الفت ہوتی
اِس قدر زار نہ اخترؔ تری حالت ہوتی
تجھ میں رم کرنے کی اے بت جو نہ عادت ہوتی
ترے وحشی کو حسینوں سے نہ وحشت ہوتی
اثر افگن جو نہ ہوتا مری قسمت کا قصور
اس کو اغیار سے ہرگز نہ محبت ہوتی
طلب عیش کا سودا جو نہ ہوتا سر میں
شام غم مرے لئے صبح مسرت ہوتی
جذبہ حسن پرستی تری عظمت کی قسم
تو نہ ہوتا تو نہ دنیا کی یہ زینت ہوتی
تم نہ آئے سر بالیں دم آخر ورنہ
تلخی مرگ میں شکر کی حلاوت ہوتی
پردے پردے میں کئے ہیں وہ ستم ظالم نے
آفت آ جاتی جو دِل میں نہ محبت ہوتی
بے وفائی سبھی معشوق کیا کرتے ہیں
تم اگر مجھ سے وفا کرتے تو جدت ہوتی
ہوتی جاتی ہے میری حسرت ایذا پامال
مجھ پہ تم رحم نہ کرتے تو عنایت ہوتی
کیوں کر مقبول تیرا حسن طبیعت ہوتا
کیوں نہ ہر بزم میں اخترؔ تیری شہرت ہوتی
برائے:مشاعرہ محفل سخن نمبر ا قیصر اسٹریٹ کلکتہ زیر صدارت خان بهادر رضا علی وحشت مدظله (۲۴ نومبر ۱۹۳۴)
نوٹ:مصرعہ طرح: آپ آتے جو کسی دن تو عنایت ہوتی