غزل 51
اخترؔ آصفی پشاوری
بھری محفل میں زارِ عشق کا اظہار ہو جانا
وہ اس کافر کا میری شکل سے بیزار ہو جانا
مبارک ہو مجھے اس کے گلے کا ہار ہو جانا
عدو کی بھینگی آنکھوں میں کھٹکتا خار ہو جانا
نہ آنا بندر بھبکی میں تم ہرگز اُس کے درباں کی
اُٹھائے وہ تمہیں در سے تو تم دیوار ہو جانا
پہنچنا رات میرا چپکے چپکے ان کے بستر پر
رگڑ لگتے ہی اُن کا خواب سے بیدار ہو جانا
نشے میں اُن کا آ جانا بہک کر مرے پہلو میں
مرے بوسوں کی ترشی چکھتے ہی ہوشیار ہو جانا
محبت کا مجھے آزار ہے چارہ گرو دیکھو
خدارا تم نہ مرے در پے آزار ہو جانا
وہ میرا ناز برداری سے ان کی خو بدل دینا
وہ ان کا رفتہ رفتہ بے سبب آزار ہو جانا
متاع دل کو اک بوسے کی خاطر ہم نہ بیچیں گے
نظر آتا نہیں ہے آپ سے بیوپار ہو جانا
یہ صورت ہے حسینوں کی نگاہوں میں سمانے کی
خود آرا ہوں جو وہ تم آئینہ بردار ہو جانا
وہ ان کی خوش خرامی اور وہ استقبال فتوں کا
وہ میرا حشر میں وارفتہ رفتار ہو جانا
نگاہیں طوف میں ہیں دل ہے لیکن بیچ میں قائم
پڑا اُس شوخ کے آگے مجھے پرکار ہو جانا
کشاکش میں وہ کھچ کر ٹوٹنا بند قبا ان کا
وہ میری خوش نصیبی سے کشود کار ہو جانا
من ان کا بڑھتے ہی گھٹنا وہ مرے دل کی رغبت کا
وہ آخر کار ان کا مرے سر پر بار ہو جانا
بٹھا لینا بہر حال ان کو اپنی گود میں اخترؔ
جو آئیں کوہ وہ بن کر تو تم کوہسار ہو جانا