آسودگی (پاکستان)

دیار گل رخاں ہے اور میں ہوں

دراے کارواں ہے اور میں ہوں

سرور جاوداں ہے اور میں ہوں

حدیث دلبراں ہے اور میں ہوں

نشاط خسرواں ہے اور میں ہوں

خودی کا آستاں ہے اور میں ہوں

سرودِ نغمہ خواں ھے اور میں ہوں

اُخوت کا جہاں ہے اور میں ہوں

بہارِ بے خزاں ہے اور میں ہوں

ہجومِ دوستاں ہے اور میں ہوں

خوشی کی داستان ہے اور میں ہوں

مری اردو زباں ہے اور میں ہوں

عطائے باغباں ہے اور میں ہوں

فروغ آشیاں ہے اور میں ہوں

موافق سا سماں ہے اور میں ہوں

گروہ خوشدلاں ہے اور میں ہوں

مرا بختِ جواں ہے اور میں ہوں

محبت کی دکاں ہے اور میں ہوں

زمین و آسماں ہے اور میں ہوں

مرا رطلِ گراں ہے اور میں ہوں