وہ اور ہم
Akhtar Asifi Peshawari
وہ حوصلہ اہل وفا دیکھ رہے ہیں
ہم تیزی شمشیر جفا دیکھ رہے ہیں
وہ ہیں کہ خبر ہی نہیں کچھ اُن کو ہماری
ہم ہیں کہ تغافل کی ادا دیکھ رہے ہیں
وہ ناز سے آرائش گیسو میں ہیں مصروف
ہم آئینے میں شانِ خدا دیکھ رہے ہیں
وہ رنگِ حنائے کفِ پا دیکھ کر خوش ہیں
ہم منظرِ خونِ شہدا دیکھ رہے ہیں
وہ پردے میں ہر چند رہیں شرم و حیا سے
ہم اُن کو مگر جلوہ نما دیکھ رہے ہیں
وہ ہیں کہ جفا کرنے پر سختی سے ہیں قائم
ہم ہیں کہ سر انجامِ وفا دیکھ رہے ہیں
وہ وصل میں بھی شرم پہ غالب نہیں آتے
ہم شوق کو مغلوبِ حیا دیکھ رہے ہیں
وہ حسن کا ممنوں سمجھتے ہیں بقا کو
ہم دہر کو مائل بہ فنا دیکھ رہے ہیں
وہ ملتفت آتے نظر اس طرف اخترؔ
ہم درد کو ممنونِ دوا دیکھ رہے ہیں