غزل 59
Akhtar Asifi Peshawari
ستم ٹوٹا ہوئیں اس شوخ سے جب مری چار آنکھیں
جگر میں ہوک اٹھی ہوگئیں خونابہ بار آنکھیں
حجابِ ناز سے پھر فائدہ کیا جب یہ عالم ہے
کہ تجھ کو چھنے والے گھورتی ہیں بے شمار آنکھیں
کسے نرگس دکھاتی ہے یہ مستانہ ادا اپنی
ابھی اس نے نہیں دیکھیں کسی کی گلعذار آنکھیں
رواں ہیں سیل گریہ رات دِن رنج جدائی میں
بنی ہیں انتظارِ دلربا میں آبشار آنکھیں
بھلا ایسے ہی عرض تمنا کیا کرے کوئی
دکھاتے رہتے ہیں ہمدم وہ مجھ کو بار بار آنکھیں
مجھے بے خود کیے دیتا ہے ترا جوشِ سر مستی
پیامِ شوق دیتی ہیں تری اے گلعذار آنکھیں
وہیں کا ہو گیا پہنچا جو میں کوئے محبت میں
ہوئیں اس درجہ محو جلوه نقش و نگار آنکھیں
شباب اور اس پہ مے نوشی یہ عالم ہے کوئی دیکھے
بنی ہیں مائلِ رنگینی صبحِ بہار آنکھیں
ترے دیدار سی سیری کبھی حاصل نہیں ہوتی
تجھے دیکھا کریں اے حسنِ حیرت گر گزار آنکھیں
بنی ہے حسرت دیدار میں یوں جان پر اخترؔ
کہ رکھتی ہیں ہمیشہ اب تو مجھ کو بے قرار آنکھیں