سهرا (آیاز محمد )
Akhtar Asifi Peshawari
رُخِ آیاز کا آئینہ دار ہے سہرا
بہار حسن سے کیا پر بہار ہے سہرا
بنی ہے بزم طرب آئینہ مسرت کا
جبین شوق کا گویا سنگھار ہے سہرا
کلی کلی کھلی جاتی ہے صورت آغوش
بنا ہوا نگہہ انتظار ہے سہرا
نقوش رخ پہ نظر آتے ہیں تمنا کے
یہ واقعہ ہے حقیقت نگار ہے سہرا
نگاہِ ناز ہے محو نیازِ نظارہ
حریم شوق میں یوں جلوہ بار ہے سہرا
چمن کا کس کے ہے نوشتہ کو شوق گُلچنی
کہ ہم کنار عروس بہار ہے سہرا
کنار حسن میں پاتا ہے ناز نشو نما
نیاز شوق کا پروردگار ہے سہرا
یہ یک دلی کا نظارہ ہے بسکہ معنی خیز
نہ سمجھو کلیوں کی محض اک قطار ہے سہرا
یہ گوندھ دیتا ہے دو دل کو ایک رشتہ میں
یہ فن ہے اسمیں بڑا پختہ کار ہے سہرا
اسی عروج پہ بے انفرادیت گل کی
اگرچہ تاج عروس بہار ہے سہرا
خوشی ایاز محمد کی ہے خوشی اخترؔ
کہ آج اس کی خوشی پر نثار ہے سہرا
Written:چاٹگام•December 28, 1951