غزل 7
Akhtar Asifi Peshawari
رسمِ اربابِ محبت کی جو پروا نہ کریں
اُن سے کہہ دو کہ محبت کا وہ دعوی نہ کریں
پھول کی آڑ میں کانٹے بھی ہوا کرتے ہیں
سیر گل آپ کریں پر اُنہیں چھیڑا نہ کریں
جی میں آتا ہے منہ چوم لوں آگے بڑھ کر
آپ منہ بند کلی مجھ کو دیکھا نہ کریں
بدگمانی سی ہوا کرتی ہے دِل میں پیدا
دیکھ کر آپ مجھے غیر کو دیکھا نہ کریں
صبح فردا سے نہ ہو صبح قیامت جو مراد
کبھی عشاق سے وہ وعدہ فردا نہ کریں
تیرگی شامِ مقدر کی بلا ہے ہم کو
کیا کریں ہم جو تری زلف کا سودا نہ کریں
آپ روزانہ سرِ شام کہاں جاتے ہیں
اِس طرح دیدے پہ دیوار اُٹھایا نہ کریں
نام دنیائے محبت میں جنہیں کرنا ہے
اپنے دِل میں کوئی ارماں وہ پیدا نہ کریں
خیریت اپنی اگر چاہتے ہیں آپ اخترؔ
کوئے خوبانِ دِل آزار میں جایا نہ کریں
Recited:مشاعرہ بزم آصفی (November 17, 1962)