غزل 68
Akhtar Asifi Peshawari
پہنچا نہ بزمِ ناز میں گو تا فلک گیا
نالہ جو دل سے ہجر میں نکلا بھٹک گیا
ہونا تھا مہربان نہ ہوا ساقی حسیں
پیمانہ میرے صبر کا آخر چھلک گیا
الٹی جو اس نے چہرۂ روشن سے یوں نقاب
ہر سمت جلوہ گاہ میں شعلہ لپک گیا
ساقی کے التفات کی بارش تھی اور ہم
واعظ کہاں سے بیچ میں آ کر ٹپک گیا
تبدیل ہوگئی خزاں بھی بہار میں
آتے ہی تیرے سارا گلستاں مہک گیا
اک بے وفا کی اب بھی جہاں یاد آ گئی
آنسو نکل کے آنکھ سے رخ پر ڈھلک گیا
اس کی نگاہِ ناز سے ہم مطمئن ہوئے
دل میں جگہ یقیں نے پا لی کہ شک گیا
تھا حُسنِ اتفاق شبِ وصلِ یار میں
نالہ گلوئے مرغِ سحر میں اٹک گیا
سازش نہیں پسند کسی کے خلاف اسے
اخترؔ کو یہ جہاں نظر ٹھٹک گیا
Published:الفلاح پشاور