غزل 72
Akhtar Asifi Peshawari
ملنے کا کیا مزا جو نہ جی کھول کر ملے
ہاں دل سے دل ملے تو نظر سے نظر ملے
لینے دیا نہ چین دلِ بے قرار نے
ملنا نہ چاہتے تھے ہم انسے مگر ملے
اب جی میں ہے کہ ایسی جگہ لیجائے جہاں
اس کے سوا کسی کو نہ میری خبر ملے
احباب لے چلے مجھے تجھ سے ملے بغیر
اے کاش راستے میں تری رہگزر ملے
دیر و حرم کی میری جبیں کو ہو کیوں تلاش
سجدے کیواسطے جو ترا سنگِ در ملے
یوں مل رہی ہے سنگِ درِ یار سے جبیں
جیسے لپٹ لپٹ کے دعا سے اثر ملے
جائے کہاں اب اس کی ملاقات کو کوئی
محفل میں وہ ملے نہ سر رہ گزر ملے
زلفیں ہٹائے کہ ذرا رخ تو چوم لوں
جب تک سوادِ شب سے بیاضِ سحر ملے
میں اس سے اپنے ذوق پرستش کی داد لوں
اخترؔ کہیں جو وہ بت بے داد گر ملے
Written in:ڈھاکہ