غزل 65
Akhtar Asifi Peshawari
مرے شوق کو ہے شورش ترے عشوو ادا سے
مرے دل میں ہے قیامت تری چشم فتنہ زا سے
ہوئی جو بلا مسلط اُسے میں نے سر پر رکھا
مرے دل کو نسبتیں ہیں ترے گیسوِ رسا سے
یوں ہی کو بہ کو محبت میں پھروں نہ کیوں ہمیشہ
میں وہ خاک منتشر ہوں جو ہو در بدر ہوا سے
کبھی آ نکل ادھر بھی کہ تجھے میں دل دکھا دوں
یہ وہ شیشہ ہے لبالب جو ہے باد وفا سے
یہ اثر مری جبیں پر جو ہے سجدہ کا نمایاں
ہے نشانِ امتیازی سنداتِ نقش پا سے
ترے وعدے پر نہ آنے کی میں کیا کروں شکایت
کہ شکایتیں رہی ہیں مجھے بختِ نارسا سے
مرے حال دل کو سن کر وہ کسی کا رُخ بدلنا
وہ زباں کو روک دینا مرا عرضِ مدعا سے
مری نکتہ رس طبیعت ہوئی مشعل ہدایت
جو بتوں سے فیض پایا تو صلا ملا خدا سے
مرے عشق نے بچھائی جو بساط آرزو کی
چمک اُٹھی دل کی دُنیا ترے حسن کی ضیا سے
مرے شوق پر بھی ڈالو کبھی تم حیا کا پر تو
مرے دل کو بھی جلاؤ کبھی وعدہ وفا سے
مری چشم شوق اخترؔ اسی شوق میں کھلی ہے
کہ وہ اس طرف بھی شاید کبھی دیکھ لے ادا سے