غزل 16
Akhtar Asifi Peshawari
میں نے جب بھی تجھے اے راحتِ جاں دیکھا ہے
دل میں جذبات کا سیلاب رواں دیکھا ہے
اللہ اللہ مرے اس بحر لطافت کا جمال
دل میں ایک موج سی اُٹھتی ہے جہاں دیکھا ہے
کیوں خزاں ہو نہ بہاروں کی رہینِ منت
کہ بہاروں ہی کو پامالِ خزاں دیکھا ہے
دل میں لہراتی کبھی دیکھیں ہیں زلفیں ان کی
ان کی زلفوں میں کبھی دل کو تپاں دیکھا ہے
ہر دم آنکھوں کو رہا کرتی ہے دلچسپ تلاش
نہیں معلوم ترا جلوہ کہاں دیکھا ہے
دل جوانی ہی سے ہے گیسوئے دُنیا میں اسیر
یہ وہ بوڑھا ہے جسے میں نے جواں دیکھا ہے
دل کو پایا ہے کبھی نازک مژگاں کا ہدف
تیغِ ابرو کا کبھی سنگ فساں دیکھا ہے
سن کے محل میں وہ اخترؔ کی غزل بول اُٹھے
بعد مدت کے یہ اندازِ بیاں دیکھا ہے
Recited:بزم آصفی ۔ میر پور (March 22, 1965)