غزل 86
Akhtar Asifi Peshawari
میکشوں کو جب خیال زلف ساقی آگیا
جھوم کرابر سیہ بادہ کدے پر چھاگیا
ابر قبلے سے اٹھا اور میکدے پر چھاگیا
مُژدہ باد اے میکشو پینے کا موسم آگیا
کیا تعجب ہے اگر زاہد نے بھی پی لی شراب
آخرش انساں ہے زہدِ خشک سے گھبرا گیا
باغباں کرتاہے دیوانوں کی اپنے دیکھ بھال
کیا فضا بدلی چمن کی موسم گل آگیا
زندگی اس کی ہے بحراس کا ہے موجیں اسکی ہیں
جستجو کی رو میں طوفانوں سے جو ٹکرا گیا
آخر میں بھید کیا ہے برہمن تو ہی بتا
جا رہا تھا میں حرم کو بتکدے میں آگیا
دیتی ہے رونق چمن کو کھلنے والی ہر کلی
غنچہ امید میرابے کھلے مرجھا گیا
دل کو پھر ذوق محبت نے مگر زندہ کیا
تیرا اندازِ ستم یاد آکے پھر تڑپا گیا
کرتی ہے دل شگفتہ تیرے جلووں کی بہار
عارض گلگوں سے تیرے چاند بھی شرماگیا
شوق منزل میں مرے قدموں کی سرگرمی نہ پوچھ
قافلے والوں کے ماتھے پر پسینہ آگیا
تیری یہ آتش نوائی ہر سخن ور میں کہاں
بزم کو اخترؔ ترا رنگِ سخن گرماگیا