غزل 9
Akhtar Asifi Peshawari
کچھ پھول ہیں شگفتہ نہیں ہیں بہار میں
موسم کا ہے کرشمہ عیاں خار خار میں
اپنا بنائے رکھتا ہے ہر اہلِ دِل کو عشق
یہ پختگی کہاں ہوسِ خامکار میں
اے شوق مرے دِل سے تو اپنی دُکاں اُٹھا
حاصل ہوا نہ کچھ بھی ترے کاروبار میں
شاید یہیں کی خاک میں ہونا ہے اس کو دفن
دِل ہے طوافِ دائرہ کوئے یار میں
ان میں جو پھنس گیا وہ نکلتا نہیں کبھی
حلقے بلا کے ہیں ترے گیسوئے تار میں
اے بے قرار دِل میں اُسے بخشتا تجھے
ہوتا اگر قرار مرے اختیار میں
دِل میں سرور ہے نہ تو آنکھوں میں نور ہے
سب کچھ لٹا چکا ہوں ترے انتظار میں
اخترؔ بڑھاؤ تم غم جاناں سےارتباط
بیکار گھل رہے ہو غمِ روزگار میں
Recited:بزم آصفی (December 24, 1962)