غزل 11
Akhtar Asifi Peshawari
کرتا نہیں میں عشق کا اظہار اِس ڈر سے
ایسا نہ ہو گر جاؤں ستمگر کی نظر سے
خنجر کی ضرورت تو نہیں قتل کو میرے
یہ کام بھی لے سکتے ہو تم تیر نظر سے
کچھ پوچھ سکوں تم سے مجھے حق تو نہیں ہے
پر اتنا تو پوچھونگا کہ آئے ہو کدھر سے
مقتل میں تمنا کا مری خون نہ کر دے
شمشیر نزاکت کی بندھی ہے جو کمر سے
جس راہ میں دی یاروں نے منصور کو سولی
گذرا ہوں کئی بار میں اس راہگذر سے
کیا ہوگا یہاں بھی جو ٹھکانہ نہ لگا ہاتھ
نکلا تھا ترے در کے بھروسے پر میں گھر سے
کھلتی نہیں اس شوخ کی پیماں شکنی بھی
وہ عیب نہیں ہے جو کیا جائے ہنر سے
اوجھل ہوئے آنکھوں سے تو کچھ غم نہیں اس کا
جاؤ گے بھلا بیچ کے کہاں دِل کی نظر سے
دِن میں نظر آنے لگے تارے مجھے اخترؔ
دیکھا ادھر اس شوخ نے کچھ ایسی نظر سے
Recited:بزم مضطر (July 14, 1963)