غزل 67
Akhtar Asifi Peshawari
جس سے واقف وہ مستِ ناز نہیں
وہ میرا شیوه نیاز نہیں
دور اشفتگانِ الفت سے
سایہِ گیسوئے دراز نہیں
سرکشی جو حرم سے کر نہ سکا
بت کدے میں وہ سرفراز نہیں
دِل چرا کر چراتے ہوں آنکھیں
راز جب کھل گیا تو راز نہیں
فرق عشق و ہوس میں ہے لیکن
آپ کہہ دیں امتیاز نہیں
پھر یہ ابر کرم ہے کیا واعظ
مے کشی کا اگر جواز نہیں
نہیں اہل نیاز وہ اخترؔ
جو خراب حریمِ ناز نہیں
Written on:June 8, 1960