غزل 25
Akhtar Asifi Peshawari
غلط ہے اے دل بدگماں کہ وہ ملتفت بہ کرم نہیں
یہ کرم نہیں کہ مرے سوا کوئی اور وقفِ ستم نہیں
وہ صنم کے جس کے وجود کو کسی دور میں بھی عدم نہیں
بس اسی کو کرتا ہوں سجدے میں وہ میرا خدا ہے صنم نہیں
وہ سرائے جلوہ ہے شیخ جی جسے آپ کہتے ہیں بتکدہ
کبھی اس کی سیر تو کیجئے وہ مقام طور سے کم نہیں
مری صبح صبح طرب نہ ہو ترا التفات نہ ہو اگر
یہ تری نگاہ کا ہے کرم مری شام شامِ الم نہیں
یہ تصورات کا فلسفہ ہے یا تخیلات کی بت گری
سبق سجود و نیاز سے یہ صنم کدہ ہے حرم نہیں
مرا مدعا تو ہے عشق سے کہ ہو تزکیہ مرے نفس کا
جو ہوائے عیش و طرب میں ہیں وہ ہوس پرستوں سے کم نہیں
چلے بس ہمارا تو توڑ دیں یہ تکلفات کی سرحدیں
یہ حیات کوئی حیات ہے ابھی تم نہیں ابھی ہم نہیں
مری زندگی کے وہ واقعے جفا و وفا کی داستاں
لکھوں کیا میں اخترِؔ خوش رقم میرے ہاتھ میں وہ قلم نہیں
Recited:بزم عندلیب مشاعره