غزل 17
Akhtar Asifi Peshawari
چہرے پر بیکلی بھی اگر رونما ہوئی
یہ جان لو کہ روحِ محبت فنا ہوئی
ڈالی تھی آشیانے کی میں نے جہاں بنا
اس شاخ پر نوازش برق بلا ہوئی
کیا میری زندگی کا کوئی مدعا نہ تھا
اک بے وفا یہ جان گرامی فدا ہوئی
حاصل نہ ہو سکے گا تیرے حسن کو دوام
میری حیات عشق اگر بے بقا ہوئی
ہر اک پہ کھل گیا تیری آہ فغاں کا راز
تھی تاب ضبط تجھ میں جو اے دل تھی کیا ہوئی
وه شاد خوں کر کے کسی بے گناہ کا
یہ خوش کہ آج رسمِ محبت ادا ہوئی
پوچھا کسی نے مجھ کو نہ گلزارِ دہر میں
پرساں اگر ہوئی بھی تو برق بلا ہوئی
تھی التفات ناز کو مد نظر جفا
اور مجھ کو دیکھئے کہ اُمید وفا ہوئی
بیگانگی اہل وطن کا گلہ ہے کیا
برگشتہ مجھ سے جب نگہہ آشنا ہوئی
اخترؔ پہنچ ہی جاؤنگا تا منزلِ مراد
اس کی نگاہِ ناز اگر رہنما ہوئی