غزل 39
اخترؔ آصفی پشاوری
شب فرقت حشر انگیز تھی آہ فغاں مری
زمیں سے جھک کے کرتا تھا شکایت آسماں مری
شبِ غم میں سبق آموز تھیں بےتابیاں مری
جلن پروانے نے سیکھی تو بلبل نے فغاں مری
یہی سورج ہے جس آفتاب حشرت بننا ہے
اگر کچھ مانگ لے گا سوزشِ دردِ نہاں مری
ترے کہنے سے زاہد ترک میخواری نہیں ممکن
جواں میں ہوں خدا رکھے طبیعت ہے جواں مری
میری وارفتگی تصویر ہے برقِ تجلی کی
ہیں آئینہ جمال یار کا حیرانیاں مری
بھر آئے جس سے آنسو اس ستم پیشہ کی آنکھوں میں
وہ پرتاثیر ہے بے تابیوں کی داستاں مری
یہ تڑپانے کی باتیں ہیں یہ ترسانے کی باتیں ہیں
نہ دیتے ہیں وہ دل میرا نہ لیتے ہیں وہ جاں مری
سُن اے غارت گر جنس وفا ترک جفا کر لے
اُٹھا سکتی نہیں اب ناز جانِ ناتواں مری
نہ ٹوٹا مرے مرنے پر جنوں کا سلسلہ اخترؔ
پہن لیں قیس و وامق نے جو اتری بیڑیاں مری
بمقام:پشاور