غزل 54

Akhtar Asifi Peshawari

جوبن آتے ہی حسینوں کو حجاب آتا ہے

شرم کو ساتھ لئے ان کا شباب آتا ہے

جیتے جی آتا ہے قاصد تو شتاب آتا ہے

دیکھئے کب مرے نامے کا جواب آتا ہے

عرض احوال کا موقعہ ہی نہیں ہاتھ آتا

جب وہ آتا ہے یہاں پا بہ رکاب آتا ہے

رندِ میخوار ہو زاہد ہو کوئی ہو ساقی

جو تری بزم سے آتا ہے خراب آتا ہے

زندگی کیسے کٹے ہنسنا تو پھر ہنسنا ہے

مرے رونے پہ بھی ظالم کو عتاب آتا ہے

کم نہیں طالع جمشید سے اس کی قسمت

جس تک اس بزم میں جام مئے نام آتا ہے

ہاں نکل جائے جو ایمان کو رکھتا ہو عزیز

لے کے محفل میں وہ بت چنگ و رباب آتا ہے

Recited:برائے مشاعرہ بزم نکات رنگون زیر صدارت علامہ عیش امروہی (September 28, 1933)