غزل 85
Akhtar Asifi Peshawari
ہوں تو باکیف گدائے در میخانہ سہی
مئے کی تلچھٹ سہی چلو مرا پیمانہ سہی
رندِ مینوش کوئی تازہ فضا کر تخلیق
نغمہ کن نہ سہی نعره مستانہ سہی
دامن عشق میں میں بھی تو گل رعنا ہوں
قلزم حسن کے تم گوہر یک دانہ سہی
سجدہ شوق کہیں ہو مجھے کر لینا ہے
کنج مسجد نہ سہی گوشۂ میخانہ سہی
آپ خاکسترِ پروانہ کو کیا کہیے گا
شمع کے روپ میں سوز دل پروانہ سہی
روبرو پیش نظر جلوۂ صد رنگ تو ہے
دلِ پُر شوق اُمیدوں کا جلوہ خانہ سہی
جرات عرض تمنا نہیں ہوتی ہم کو
تیرا اندازِ نظر شوق پذیرانہ سہی
بڑھ کے پھر دستِ ہوس شیشہ اُٹھا جام اٹھا
ایک بار اور وہی جرات رندانہ سہی
کب کہا میں نے ملے بھر کے پیالہ ساقی
گھونٹ دو گھونٹ سہی نصف ہی پیمانہ سہی
آپ کا پاس محبت تو ہے مجھ کو ہر دم
آپ سے دور سہی آپ سے بیگانہ سہی
مفت کی بحث میں سر کون کھپائے اخترؔ
آپ فرزانہ سہی اور میں دیوانہ سہی
Written:ڈھاکہ•August 14, 1951