دعوت
Akhtar Asifi Peshawari
پھر بہار رفتہ کی دعوت کا ساماں کیجئے
شام تنہائی کو پھر صبح گلستاں کیجئے
پھر عمل کی روشنی سے دل کو تاباں کیجئے
خانہ تاریک کو سرو چراغاں کیجئے
کیجئے دل کو عمل کے حلقہ کوشش کی نذر
پھر تماشائے بہارِ گل بداماں کیجئے
دیکھئے آوارہ گان کو چہ الفت کا حال
آپ شانوں پر نہ زلفوں کو پریشاں کیجئے
چھیڑ کر افسانہ صبح وطن پردیس میں
دور دل سے کلفت شام غریباں کیجئے
چھوڑیئے کچھ صفحہ تاریخ پر اپنے نشاں
قصہ اسلاف نذر طاق نسیاں کیجئے
دامنِ دل داغہائے شبہہ سے آلودہ ہے
بیعت ساقی سے تجدید ایماں کیجئے
سینہ دریا میں پنہاں جزر بھی ہے مدبھی
زیست کی کشتی کو واقف موج طوفاں کیجئے
ہستی آئینہ کو بیکار کر دیتا ہے رنگ
صیقل کوشش سے جوہر کو نمایاں کیجئے
دل کا مقصد محض ارمانوں سے برآتا نہیں
اٹھ کے شمعیں سعی و کوشش کی فروزاں کیجئے
بڑھ رہے ہیں کا رواں در کارواں اہل طلب
آپ بھی تو کوچ کا کچھ اپنے ساماں کیجئے
منزل مقصود کا جلوہ نظر آتا ہے صاف
کیجئے شوق طلب کو پابہ جولاں کیجئے
تا بہ کئے بہلائیگا قصہ ماضی سے دل
حال کے پرتو سے مستقبل درخشاں کیجئے
کامیابی اور ناکامی مقدر سے سہی
آپ جدوجہد تو تاحد امکاں کیجئے
گونجتا ہے نالہ موزوں سے اخترؔ کے جہاں
اکدن اس کو اپنی محفل میں غزل خواں کیجئے