غزل 24

Akhtar Asifi Peshawari

داغ بن کر دل مخروں میں فروزاں ہوں گے

جو ستارے سرِ مژگاں نہ درخشاں ہوں گے

عمر ہم کوچہ الفت میں بسر کر دیں گے

اور مٹنے پہ بھی خاکِ درِ جاناں ہوں گے

اپنے ارمانوں کا ہم کرتے نہ ہر گز اظہار

کیا خبر تھی کہ یہ رسوائی کا ساماں ہوں گے

ہم جہاں بھی گئے ویرانہ ہی ویرانہ ملا

تم جہاں ہو گے گلستاں ہی گلستاں ہوں گے

آپ آ کر شب وعدہ مرے گھر دیکھیں تو

بارِ خاطر نہ مری جاں مرے ارماں ہوں گے

باغباں فکر نہ کر موسم گل آنے دے

نہ نظر آئیں گے دامن نہ گریباں ہوں گے

خیر مقدم نہ تم اصنامِ مجازی کا کرو

بس گئے دل میں تو یہ جان کے خواہاں ہوں گے

خلل انداز عبادت میں اگر تو نہ ہوا

تیرے مجنوں ہم اے جذبہ عصیاں ہوں گے

آج کی رات بھی گنوائے گی تارے اخترؔ

وہ نہ آئیں گے نہ پورے مرے ارماں ہوں گے

←Back to Collection